POITTA T’ASA BOLLI, FILLA, COIAI?

POITTA T’ASA BOLLI, FILLA, COIAI?

Poitta t’asa bolli, filla, coiai
ca èst bregungia finzas su ddu fai iscìi.
No iscìs fai farra e no iscìs fai pani,
no iscìs prenciai e nimmancu cosìi,
e no sès bona mancu fogu a allumingiai.
S’atti tua èst custa: a pappai e a drommìi.
Èst abarràda ùnu mesi chenza ‘e si isciacquai
e a si ndi pesai a toccus de mesudìi.
E poisi d’ammàncat su lettu ‘e croccai,
no tenid cammisas mancu de si estìi.
Me in coianza itta nc’ada pottai?
Nimmancu ùnu pannigheddu tenid po si xrobìi
e lanzorus e mantas esti ancora a comporai,
crobisi e carrigusu ancora funti inìi.
Custu èst contu ‘e arrìi ca no tenid mancu vasus,
no tenid trattagasus, no tenid mancu bazzìnu:
ùna perra ‘e tostoìnu a ca pottad po pisciai.
Ollidi a da sposai ma no tenid mancu pingiadas,
nì cassarollas ladas e nimmancu schiscionèras,
nì turras e nì culleras, nì prattus e nì coccionìus,
nì prattillius drocchinus, nì ciccaras e nì saffattas,
nì froris e nì alzattas, nì isprigus e ne santus.
Però gei tenid guantus me in sa cammisa ‘e notti.
No at pozziu tenni sotti de tenni frocchittas
però tenid agullittas po su cancaiòni.
No tenid schidòni, nì broccas o isciffeddas.
Ma gei tenid miggias nieddas e mudandas de pannu.
Nì mesedda e nì iscannu, nì mesas e nì cadiras.
No tenid mancu cadrigas e nimmancu zuccurèras
ma tenid ses caffetteras e ùna pigad brocca ‘e mesu.
Si da bideis de tesu tirad prus de duas passas.
No tenid mancu tassas e nimmancu bottillias,
no tenid mancu mesillias e cummòu a sa manu,
no tenid cattara(n)u e nimmancu credenza,
nì trebini in possidenza, no tenid mancu sadazzu.
S’adi comporau ùnu mazzu de arrosarius nous
e funti andaus assous po sa dìi de sa scialla.
No tenid mancu mialla, nì ferrus e nì didai.
Ca no ndi iscìdi pottai èst cannotta a su fragu,
no tenid trattagasus e nimmancu carrafinas,
però tenid aìnas pigadas a primmòri.
Doighi atturradoris e deghi mulluinettus,
bottus a doppiu ettus po zuccuru e po caffei.
Si no d’olleis crei baggei a dus contai…..
Interpretata da GAVAURRU (Salvatore Manca)